جهاز Pulsar بالعربي: طريقة الاستخدام ووصفة الحار والبارد

١٠ نوفمبر ٢٠٢٦
OHM
دليل جهاز Pulsar بالعربي ووصفة التحضير من محمصة أوم

إذا تحب القهوة المقطرة وجربت V60 وتبي كوب أنظف وأثبت من مرة لمرة، غالبًا سمعت عن Pulsar من NextLevel. في هذا الدليل نشرح وش هو الجهاز، وكيف يشتغل، ووصفة التحضير اللي نستخدمها في محمصة أوم للحار والبارد، والفرق بينه وبين V60.

باختصار: Pulsar جهاز تقطير «بدون تسريب جانبي» (No-Bypass)، فيه صمام تتحكم فيه بنزول الماي، وغطاء يوزع الماي على القهوة بالتساوي. النتيجة: استخلاص متساوي وكوب نظيف، وتقدر تحضر فيه بطريقة الغمر أو التقطير أو الاثنين مع بعض.

وش هو جهاز Pulsar؟

Pulsar جهاز تحضير قهوة مقطرة من شركة NextLevel الأمريكية، صممته الشركة مع عالم الفيزياء الفلكية Jonathan Gagné. شكله أسطوانة شفافة بقاعدة سوداء، والفلتر فيه ورقي دائري ومسطح في القاعدة، مو مخروطي مثل V60.

الفكرة الأساسية فيه إنه «بدون تسريب جانبي»: في أغلب أدوات التقطير جزء من الماي يمشي على جوانب الفلتر وينزل للكوب بدون ما يمر على القهوة كفاية. في Pulsar كل الماي لازم يمر من خلال القهوة، فيطلع الاستخلاص متساوي أكثر.

مكونات الجهاز

  • الصمام: تحت الجهاز. إذا قفلته يصير التحضير غمر كامل (القهوة تتشرب الماي)، وإذا فتحته يصير تقطير. وتقدر تقفله في البداية وتفتحه بعدين، وهذا اللي نسويه في وصفتنا.
  • الغطاء الموزع: تصب الماي فوقه، ويوزعه على القهوة بالتساوي، فما تحتاج تتقن طريقة الصب مثل V60.
  • الفلتر: ورقي دائري ومسطح مقاس 80 ملم، مخصص لجهاز Pulsar.
  • الجرعة: يناسب من 15 إلى 40 جرام قهوة.

وصفة Pulsar الحار من محمصة أوم

تحضير القهوة بجهاز Pulsar والصمام مقفول في مرحلة التشريب

هذي الوصفة اللي نستخدمها عندنا في المحمصة:

  • القهوة: 20 جرام
  • الماي: 330 مل
  • الطحنة: وسط إلى خشن، حسب المطحنة
  • حرارة الماي: 92 درجة
  1. حط الفلتر في القاعدة، وحط القهوة المطحونة، واقفل الصمام.
  2. صب 60 مل ماي على الغطاء الموزع.
  3. خل الصمام مقفول لين دقيقة و20 ثانية، عشان القهوة تتشرب وتطلع الغازات (مرحلة التشريب).
  4. افتح الصمام، وكمّل الصب لين توصل 330 مل.
  5. انتظر لين ينزل الماي كله، وقدّم.

وصفة Pulsar البارد من محمصة أوم

نفس الخطوات بالضبط، الفرق في كمية الماي:

  • القهوة: 20 جرام
  • الماي: 240 مل
  • الثلج: 7 إلى 8 حبات
  • الطحنة: وسط إلى خشن، حسب المطحنة
  • حرارة الماي: 92 درجة
  1. حط 7 إلى 8 حبات ثلج في الإبريق أو الكوب تحت الجهاز.
  2. اقفل الصمام، وصب 60 مل ماي.
  3. خل الصمام مقفول لين دقيقة و20 ثانية.
  4. افتح الصمام، وكمّل الصب لين توصل 240 مل.

Pulsar ولا V60؟

مقارنة جهاز Pulsar مع V60 - محمصة أوم

طريقة التحضير: V60 تقطير بس، والماي ينزل على طول. Pulsar تقدر تخليه غمر أو تقطير أو تجمع الاثنين بالصمام.

توزيع الماي: في V60 لازم تتقن الصب الدائري بإبريق عنق الإوزة. في Pulsar الغطاء يوزع الماي عنك.

ثبات النتيجة: في V60 النتيجة تتغير حسب يدك وطريقة صبك. في Pulsar أسهل تطلع نفس الكوب كل مرة.

الفلتر: V60 فلتر مخروطي ومتوفر في كل مكان. Pulsar فلتر دائري مسطح مخصص له.

يناسب مين؟ V60 يناسب اللي يحب يتحكم في كل تفصيلة في الصب. Pulsar يناسب اللي يبي كوب نظيف وثابت بخطوات أقل.

وإذا تبي تعرف أكثر عن V60، اقرأ دليل V60 الكامل.

أي محصول يناسب Pulsar؟

Pulsar يطلع كوب نظيف وواضح، فيبرز الإيحاءات الفاكهية بشكل حلو. وأغلب محاصيلنا في محمصة أوم فاكهية، مثل:

وإذا تحب الطعم الكلاسيكي، جرب دانة الكولومبي بإيحاءات الشوكولاتة والكراميل. وتلقى كل المحاصيل في قسم محاصيل القهوة المختصة.

أسئلة شائعة

هل Pulsar يجي معه فلاتر؟

لا، الجهاز ما يجي معه فلاتر. تحتاج فلاتر Pulsar الورقية (100 فلتر)، وتلقاها عندنا، فاطلبها مع الجهاز.

هل أقدر أستخدم فلاتر V60 مع Pulsar؟

لا، Pulsar يحتاج فلتر دائري مسطح مقاس 80 ملم مخصص له.

وش الفرق بين Pulsar و Pulsar Mini؟

Pulsar العادي يناسب من 15 إلى 40 جرام قهوة وفلتره 80 ملم. Pulsar Mini أصغر، يناسب من 12 إلى 20 جرام وفلتره 58 ملم، وفلاتر الاثنين ما تتبادل.

ليش أقفل الصمام في البداية؟

عشان القهوة تتشرب الماي بالكامل وتطلع الغازات قبل ما يبدأ التقطير، وهذا يخلي الاستخلاص متساوي أكثر.

كم يكفي الجهاز؟

بوصفتنا يطلع كوب 330 مل للحار، ويقدر ياخذ لين 40 جرام قهوة إذا تبي تحضر لأكثر من شخص.

Pulsar قريبًا في محمصة أوم

جهاز Pulsar من NextLevel واصل لنا قريبًا، ومعه فلاتر Pulsar بعد. ادخل صفحة الجهاز واضغط «أعلمني عند توفره»، ونرسل لك أول ما يتوفر. ونشحن لكل مناطق المملكة، ونوصل داخل المدينة المنورة خلال 24 ساعة أو تستلم من المحمصة، والشحن مجاني للطلبات فوق 150 ريال.

غير موجود